Средба на Џафери со мексиканскиот амбасадор Бланко

Парламентарниот спикер Талат Џафери, во средата се сетна со вонредниот и ополномоштен амбасадор на Мексико во Република Македонија, Марко Антонио Гарсија Бланко, информираа од Одделението за јавно информирање и односи со јавноста на Собранието.

Амбасадорот ги пренел поздравите од претседателката на Претставничкиот дом и претседателот на Сенатот на Конгресот на Мексико и ја презентираше кандидатурата на сенаторката Габриела Куевас Барон за претседател на Интерпарламентарната унија (ИПУ), нагласувајќи дека сенаторката Куевас Барон има големо парламентарно и меѓународно искуство и изрази надеж дека ќе ја има поддршката и од Делегацијата на Собранието на Република Македонија за нејзиниот избор.

Џафери нагласил дека се залага за промовирање на парламентарната дипломатија и унапредувањето на билатералните односи помеѓу Македонија и Мексико, истакнувајќи дека во Собранието веќе е формирана Пратеничка група за соработка со парламентите на земјите од Латинска Америка и Карибите. Тој посочил дека Собранието позитивно гледа на кандидатурата на сенаторката Куевас Барон за претседател на најголемата меѓународна парламентарна организација – ИПУ, со оглед на нејзината импресивна биографија и богатото меѓународно искуство.

На средбата станало збор и за можностите за продлабочување на политичката и економската соработка помеѓу двете земји, за што веќе се преземени првите чекори со потпишување на меморандуми за соработка помеѓу владите, стопанските комори и агенциите за привлекување на странски инвестиции. Во овој контекст, Џафери укажа на потребата од укинување на визите за влез во Мексико за граѓаните на Република Македонија.

Доколку преземете содржина од оваа страница, во целост сте се согласиле со нејзините Услови за користење.