Во штипското село Брест се одржа 21. средба на Македонците кои се протерани од Егејскиот дел на Македонија, пренесува МИА.
Претседателот на Сојузот на децата-бегалци од Егејскиот дел на Македонија „Македон“, Ташко Јованов вели дека на овие средби секоја година испраќаат пораки до европските институции, но и до грчките власти за да се решат проблемите со кои се соочуваат Македонците од Егејска Македонија.
– Имаме порака до младиот претседател на Владата на Грција, Ципрас да ги отвори архивите на Комунистичката партија во Грција и Македонците кои се бореа заедно во Граѓанската војна и точно да ја дознаеме вистината меѓу грчката држава и Македонците протерани. Второ, младиот премиер Ципрас сигурно ќе најде разбирање и ќе ги укине нашите црни печати, вели Јованов.
Претседателот на Здружението „Македонски Егеј “- Штип, Јордан Тунев вели дека повторно на Велигден на едно место се собраа прогонетите Македонци од Егејска Македонија, кои живеат во земјава и странство со една цел да се видат, но и да испратат пораки.
Тунев вели дека грчкиот премиер Ципрас треба да го реши проблемот со црните печати на нивните пасоши и да престане дискриминацијата кон Македонците кои се родени во Егејска Македонија, бидејќи, како што рече тој, гледаме дека Европа во моментов е без граници.