четврток, 8 декември 2016  |  Вести денес: 0

Стандард и Пурс“ по втор пат годинава го потврди кредитниот рејтинг на РМ

„Стандард и Пурс“ оценува дека македонскиот денар е стабилен. Девизните резерви ја покриваат монетарната база и се дури два пати повисоки од неа.

standard-end-purs

Последни вести

Рејтинг агенцијата „Стандард и Пурс“ по втор пат годинава го потврди кредитниот рејтинг на Република Македонија ББ – со стабилен изглед.

Како што наведува кредитната агенција во извештајот, потврдата на рејтингот се должи на потенцијалот за развој на македонската економија под влијание на инвестициските приливи. „Стандард и Пурс“ забележува дека извозот продолжува да расте со засилена динамика, како резултат на проширувањето на производствените капацитети и влезот на нови странски инвестиции во слободните економски зони.

За разлика од странските компании, домашните компании се прудентни кога станува збор за нови инвестиции и чекаат да поминат парламентарните избори и да се разреши политичката криза. Како што се вели во извештајот на агенцијата, доколку се одржат изборите во декември, тие очекуваат засилена инвестициска активност следните неколку години, што заедно со силниот раст на извозот ќе биде значајна поддршка на економскиот развој.

Од кредит агенцијата очекуваат да се создаде силна синергија помеѓу компаниите од слободните економски зони и домашните компании, што ќе биде двигател на развојот и ќе влијае на понатамошно намалување на стапката на невработеност. Согласно проекциите на агенцијата, стапката на невработеност ќе продолжи да се намалува континуирано и во следните три години.

Поради пролонгирањето на политичката криза, како што се наведува во извештајот на „Стандард и Пурс“, тие ја намалуваат проекцијата за раст на македонската економија за годинава од 3,3% на 2,3%. Агенцијата забележува дека политичката криза во Македонија продолжува. Изборите постојано се закажуваат и одложуваат, прво во април, потоа во јуни и иако политичките партии во август се согласиле дека сите потребни услови за одржување на избори се исполнети, не може целосно да се исклучи можноста за одложување на изборите кои треба да се одржат во декември, се наведува во извештајот.

Во извештајот на агенцијата се нотираат и августовските поплави во Скопје, кои придонеле за втор ребаланс и проширување на буџетскиот дефицит. Кредитната агенција смета дека е потребна посилна фискална консолидација, но напоменува и дека дефицитот е резултат на владините политики за јавни инвестиции кои се потребни за економски развој. Во однос на државниот долг, агенцијата вели дека иако е поголем во однос на 2009 година е сеуште релативно низок.

„Стандард и Пурс“ оценува дека македонскиот денар е стабилен. Девизните резерви ја покриваат монетарната база и се дури два пати повисоки од неа. И покрај неколку закани од надвор изминативе години, македонскиот банкарски систем функционира беспрекорно, заклучува агенцијата. Народната банка преку политиките и мерките кои ги спроведува успешно ги надминува епизодните предизвици, вклучително и ефектите од шпекулациите за девалвација на денарот од април кои се покажаа како неточни.

Најчитани вести