Генералниот секретар на НАТО, Јенс Столтенберг синоќа имаше телефонски разговор со американскиот претседател Доналд Трамп, при што двајцата уште еднаш ја потврдиле важноста на Алијансата во „проблематичните времиња“, јави дописникот на МИА од Брисел.
Во вториот нивен телефонски разговор откако Трамп ја презеде функцијата претседател на САД, тој и Столтенберг го разгледале напредокот во однос на борбата против тероризмот, а разговарале и за буџетот за одбрана на НАТО, информира Северноаталанската алијанса.
Според НАТО, Трамп и генералниот секретар на најголемата воено-политичка организација на светот ја нагласиле и потребата од континуирани напори за да се обезбеди фер споделување на товарот меѓу сојузниците на НАТО околу буџетот за Алијансата.
Тие, исто така, разговарале и за зголеменото насилство во источниот дел на Украина и изгледите за мирно решение на кризата во оваа земја.
– Генералниот секретар потсети на конзистентната политика за силна одбрана и дијалог со Русија. Столтенберг и претседателот Трамп се радуваат на претстојниот самит на НАТО во Брисел кон крајот на мај за да разговараат за овие прашања, се наведува во соопштението на прес-службата на Алијансата.
