Македонија

Студентката Наталија Трајковска со најдобар есеј на УКЛО

Студентката Наталија Трајковска со најдобар есеј на УКЛО

Универзитетот „Св.Климент Охридски“-Битола (УКЛО) ги објави резултатите од наградниот конкурс на УКЛО за најдобар есеј и најдобар истражувачки труд.

Првата награда за најдобар есеј на слободна тема ја освои студентката Наталија Трајковска од Правен факултет-Кичево, автор на есејот „Бебе, девојче, сестра, девојка, госпоѓица, жена, госпоѓа, мајка, баба, старица“, втората награда и припадна на Виолета Павлеска, студентка на Факултетот за информатички и комуникациски технологии – Битола за есејот „Инферно“, додека третата награда беше доделена за есејот „Визија за подобро утре“ од Андрина Поповска, студентка на Правен факултет – Кичево, дисперзирани студии во Битола.

– Според востановената традиција во пресрет на патрониот празник на универзитетот се распишува конкурсот за најдобар есеј и најдобар истражувачки труд, а интересот од година во година е се поголем. Комисиите внимаваат на квалитетот на трудовите и затоа во конкуренцијата најдобар истражувачки труд годинава се додели само една втора награда и тоа за трудот „Употреба на јаглехидратите во исхраната на адолесцентите во регионот на Југозападна Македонија“ на студентката  Александра Николовска од Технолошко-технички  факултет – Велес, дисперзирани студии Битола, истакна Елизабета Ангелеска-Атанасоска, советник за односи со јавност во Ректоратот на Универзитетот „Св.Климент Охридски“-Битола.

Свеченостите по повод 35-годишнината од основањето на УКЛО ќе бидат заокружени утре на Високата медицинска школа, каде гостин предавач ќе биде Мохамад Ариф, претставник на УНХЦР во Скопје.