Земјите од еврозоната тајно подготвуваат план за исклучување на Грција од монетарниот сојуз доколку Атина прогласи банкрот следниот месец, пишува британскиот весник „Тајмс“, пренесува МИА.
Според весникот, детални планови се ставени во документ подготвен од финското Министерство за финансии во соработка со Германија.
Во документот се предупредува дека оваа пролет треба да се донесат „многу тешки политички одлуки“.
– Со преќутна согласност на останатите земји од еврозоната започна процес, кој на крајот може да доведе до исклучување на Грција од еврозоната, се наведува во текстот со датум од 27 март.
Финска е убедена дека преку реформите од последните три години и мерките преземени од Европската централна банка, еврото може да ја надмине бурата, која ќе се појави по исклучувањето на Грција од еврозоната, нагласува „Тајмс“.