По две одиграни кола Лига на шампиони, на првите две позиции на листата најдобри стрелци се ракометарите на македонските претставници во елитната лига.
Македонскиот репрезентативец и нов капитен на Металург, Филип Талески, е водечки стрелец со 17 постигнати голови од кои дури 13 Талески ги постигна на првиот меч против Елверум. Во второто коло против Татран Прешв, Талески партиципираше со 4 гола, недоволно Металург да избегне пораз.
Веднаш зад него, на 2.место е ракометарот на Вардар, Алекс Дујшебаев со 16 голови, исто колку што има Уве Генсхајмер член на Пари Сен Жермен.
Во листата „топ 50“ е уште и Вуко Борозан од Вардар кој со 9-те постигнати гола е на делба на 39-тото место.
Помалку неочекувано на оваа листа го нема името на капитенот на македонската репрезентација и член на Барселона, Кирил Лазаров кој досега на двата одиграни натпревари има постигнати само 6 гола.