Во ритамот на музиката на неодамна починатата музичка ѕвезда Дејвид Боуви, на 24 април ќе се танцува на улиците на Скопје и на плоштадот Македонија. Парадата на танцот со наслов “Танцуваме со ‘Виталиа'” ќе почне напладне. Организаторот, манифестацијата “Танц фест”, ги поканува сите танцови студија, танц-ентузијасти, а наедно и сите граѓани, без разлика на возраста, професијата, верата, националната припадност, да се приклучат во танцувачкиот спектакл.
Целта е преку танцот да се ослободиме од секојдневните стресови, да се забавуваме и заедно танцувајќи, да го возбудиме духот на градот. Бројот и возраста на учесниците не се ограничени. Пожелно е секој да осмисли костим, шминка, маска, реквизит со кој ќе предизвика внимание и ќе придонесе за подобра забава, велат организаторите.