„Грчка маслинка“ влегува во парламентот во Атина

Нова левоцентристичката формација под името „Грчка маслинка“ по иницијатива на 58 личности од светот на политиката, науката и уметноста ќе биде официјално претставена во понеделник во Атина, пренесува весникот „Катимерини“.

Иако лидерот на ПАСОК, Евангелос Венизелос изрази поддршка за иницијативата, неколку актуелни и поранешни пратеници од Социјалистичката партија, помал партнер во владејачката коалиција, изгледа не се убедени во шансите за успех.

Засега не е познато кои пратеници од ПАСОК ќе присуствуваат на настанот.

Во меѓувреме, претставниците на Демократската левица (ДИМАР), која ја напушти владината коалиција поради несогласување со одлуката за затворање на државната радио и телевизија ЕРТ , се спротивставија на одбивањето на лидерот на ДИМАР, Фотис Кувелис да започне дијалог со „Грчка маслинка“, пренесува весникот .

Дури и пред новата формација да започне официјално да постои, истакнати членови на иницијативата изгледа се раздвоени во однос на насоката во која треба да делува.

Поранешниот пратеник од ПАСОК и министер Ана Диамандопулу навести вчера дека „Грчка маслинка“ треба да стане регуларна политичка партија. Друг поранешен министер на ПАСОК – Никос Бистис, сепак индиректно ја исклучи ваквата перспектива.

Иницијативата ја покрена 58 грчки интелектуалци, економисти, универзитетски професори, писатели, бизнисмени и уметници.

Доколку преземете содржина од оваа страница, во целост сте се согласиле со нејзините Услови за користење.