Многупати досега и на голем број локации во Скопје започнуваат некакви градежни зафати на сообраќајници или тротоари и траат со месеци, а тоа не е само нервоза за граѓаните туку и опасно движење по тротоарите и коловозите, но и трошење дополнително време и граѓански пари за сето тоа.
Пример за тоа е проблемот на пешаците што поминуваат по улицата Теодосиј Гологанов, каде од крајот на август и почетокот на септември минатата година беа извадени павер-коцките од тротоарите, а градежните работи се оставени во мирување. По должината на улицата од автобуската постојка на линијата со бројот „5“ кај Министерството за економија до продажниот центар на „Веро“ е речиси невозможно да се пешачи по тротоарите, па пешаците во одредени делови се принудени да пешачат по коловозот.
Водат ли воопшто сметка надлежните за нас граѓаните, бидејќи секојдневно по оваа сообраќајница се изложуваме на ризик? Нема каде да се помине, остана само чакалот на тротоарите, а во некои делови мораме да се движиме и по коловозната лента на улицата додека покрај нас поминуваат автомобили, реагираат жителите.
Ги прашавме во градот зошто толку долго останаа раскопани тротоарите на градската сообраќајница Теодосиј Гологанов и каде ќе завршат павер-коцките. За нивното местење се потрошиле пари, а сега повторно ќе се вложат нови средства за асфалтирање на тротоарите.
На посочената локација се изведуваа градежни работи од страна на ЕВН. По завршувањето на нивните работи, градот Скопје изврши проширување, каде што сега ќе се добијат и поголема пешачка и велосипедска патека. Градежните работи се прекинати поради временските услови и штом тие ќе дозволат, ќе продолжат. Новата пешачка и велосипедска патека ќе бидат направени од асфалт, а бекатонот ќе биде отстранет и складиран од страна на ЈП „Улици и патишта, каде што тие ќе одлучат на која локација да го постават – одговорија од градот.
Неодамна градот се огласи и со известување до јавноста за новиот план за реконструкции на сообраќајници за годинава, како и за други објекти за оваа година.
Градот Скопје на 12.2.2019 година испрати допис до сите државни институции, претпријатија и поголеми компании, каде што се наведени сите сообраќајници и објекти на кои се предвидени градежни активности во 2019 година. Во дописот ги потсети државните институции, претпријатијата и компаниите дека по завршувањето на градежните работи на објектите нема да бидат дозволени попречни и надолжни прекопи на сообраќајницата во наредните три години, сметано од денот на технички прием на објектот. Поради овие причини, доколку постои потреба од поставување некакви инсталации или друг вид градежни интервенции на посочените сообраќајници, потребно е да се поднесе барање до градот Скопје за координирање на понатамошните активности – стоеше во информацијата од градот.
