Тетовка била фатена во шверц на 14 грама хероин, завчера на граничниот премин Табановце, информираше Основното јавно обвинителство Куманово. На осомничената и одреден притвор.
Постапувајќи по кривична пријава поднесена од Царинската управа, ОЈО Куманово започна постапка против едно лице осомничено дека сторило кривично дело-Неовластено производство и пуштање во промет наркотични дроги, психотропни супстанци и прекурсори од чл.215 став 1 од Кривичниот законик.
Осомничената, 33-годишна жителка на Тетово, се товари дека на 30.04.2018 година, на граничниот премин Табановце, при влез во Република Македонија, се обидела да внесе наркотична дрога хероин. Имено, осомничената како патник во автобус од еден превозник, во преграда која се наоѓала на потпирачот за раце и која била наменета за отпад, се обидела да сокрие две најлонски пакувања замотани во хартија со наркотична дрога хероин со вкупна маса од 13,44 грама. При извршен претрес во автобусот дрогата е откриена и одземена од страна на овластени царински службеници, велат од обвинителството.
Надлежен јавен обвинител до Основниот суд Куманово поднесе предлог за определување мерка притовр за осомничената. Судијата на претходна постапка од Основен суд Куманово спроведе постапка и со решение го уважи предлогот на Обвинителството, односно ја определи предложената мерка притвор во времетраење од 30 дена.