Тодоров: За четири години во здравството ќе се инвестираат 200 милиони евра

Во следните четири години во здравството се планира силен инвестициски циклус во износ од над 200 милиони евра во здравствената инфраструктира и набавка на нова опрема, изјави министерот за здравство Никола Тодоров, при денешната посета на Државната клиника за кардиохирургија.

– Само за нова опрема во здравството се предвидува да бидат вложени 33 милиони евра и некаде околу 170 милиони евра во изградба и реконструкција на здравствената инфраструктура, рече Тодоров.

Посочи дека во рамки на Државната клиника за кардиохирургија ќе се гради хибридна сала.

– Хибридната сала ќе значи сериозен чекор напред не само за Државната кардиохирургија, туку на целиот македонски здравствен систем. Тоа е една силна капитална инвестиција што ќе овозможи изградба на сала, каква што нема во целиот регион и ќе биде сериозна придобивка за пациентите од Македонија, но и за целиот регион, рече Тодоров.

Посочи дека тоа ќе значи помалку болнички денови, инвазивни методи, побрзо отпуштање на пациентите од болница, многу помали компликации и сериозно намален морталитет кај најсложените операции.

– Кај еден тип операции морталитетот порано бил и до 40 проценти на светски рамки, а со нови модерни техники тоа е намалено на 20 отсто, а таму каде што има хибридна сала морталитетот е намален на два процента. Тоа е сериозна придобивка за пациентите, но и за целиот здравствен систем, рече Тодоров.

Истакна дека хибридната сала значи во иста просторија да има конвенционална хируршка сала и апарати за интервентна радиологија и крадиологија, што значи дека нема да се користи само за кардиохируршки или крадиоваскуларни интервенции, туку таа ќе може да се користи и за невро хирургија и некои други гранки.

Во следните четири години, потсети Тодоров, е предвидена изградба на Нов клинички центар во Скопје, Клиничка болница во Штип, реконструкција на Клиниката за кардиологија, на Инфективната клиника, Градската општа болница „8-ми Септември“, како и реконструкција на сите амбуланти во Скопје, комплетна внатрешна реконструкција на клиничките болници во Битола, Струмица и Охрид, како и комплетно нова здравствена инфраструктура на трите клинички болници Тетово, Штип и Битола.

Доколку преземете содржина од оваа страница, во целост сте се согласиле со нејзините Услови за користење.