Македонија

Трајановски на самит на главни градови во Белград

Трајановски на самит на главни градови во Белград

Градоначалникот на Град Скопје, Коце Трајановски, присуствуваше на Самитот на главни градови (Capital Summit 2015) кој се одржи денеска во Белград.

Станува збор за Самит  на кој учествуваа градоначалници од локалните самоуправи од 12 градови од централна и од југоисточна Европа, каде што покрај градоначалникот на Скопје, присуствуваа и Александар Вучиќ, Премиер на Србија, Синиша Мали, градоначалник на Белград (Србија), Иво Комишиќ, градоначалник на Сараево (Босна и Херцеговина), Милан Бандиќ, градоначалник на Загреб (Хрватска), Зоран Јанковиќ, градоначалник на Љубљана (Словенија), како и претставници од Виена, Варшава , Атина , Будимпешта, Софија, Тирана, и Подгорица.

На Самитот на главни градови покрај претставници од градовите, присуствуваа и високи претставници од Европската комисија и од Европскиот Парламент, меѓународни организации и бизнис заедницата. На Самитот се разговараше за развојот на големите инфраструктурни проекти и унапредувањето на квалитетот на животот во главните градови.

Овој самит е организиран во соработка со Националната алијанса за локален економски развој (NALED) и е одлична можност  за унапредување на соработката на регионите и главните градови, поттикнување на економската соработка, поттикнување на економска размена и инвестиции и промоција на најдобрите примери во областа на инфраструктурата, урбанистичкиот развој, како и примери за развој на јавните и на комуналните услуги.

Самитот на главни градови е организиран во три посебни тематски целини: „Инфраструктура и урбан развој“, „Иновативни модели за давање услуги за граѓаните и бизнис заедницата“, и „Квалитет на животот и иден развој на градовите во централна и во југоисточна Европа“.