Тројца повредени, девет лица приведени на напреварот меѓу „Куманово“ и „МЗТ“

Три лица се повредени а деветмина приведени за време на одигрувањето на првенствениот кошаркарски натпревар помеѓу екипите на КК „Куманово“ од Куманово и КК „МЗТ“ од Скопје, што се одржа синоќа во спортската сала во Куманово.

Oколу 20,30 часот полицијата морала да интервенира за нарушен јавен ред и мир.

МВР денеска соопшти дека во текот на третата четвртина од натпреварот од страна на публиката врз гостинските играчи се фрлени разни тврди предмети и недолично однесување при што од страна на делегатот во 20:28 часот е прекинат натпреварот, а во писмена форма е побарано од страна на полицијата да се испразни салата за продолжување натпреварот.

Од страна на организаторот на разглас е побарано навивачите мирно да ја напуштат салата, меѓутоа истите започнале уште посилно да скандираат дека не сакаат да излезат, продолжувајќи со палење бакли и со фрлање на разни предмети кон теренот и полицијата, при што од страна на Единицата за брзо распоредување е пристапено кон празнење на салата со потиснување на навивачите, стои во соопштението од МВР.

По излегување од салата, се посочува, навивачите продолжиле со нарушување на јавниот ред и мир, со фрлање на камења кон влезната врата на спортската сала, при што се скршени повеќе стакла и повредени се тројца полициски службеници, а оштетени се и две патнички моторни возила.

Од страна на полицијата, се вели во соопштението, масата е разбиена, а состојбата нормализирана, при што привидени се девет лица, од кои на шест им се изречени прекршочни платни налози за сторени прекршоц, а за три лица кои се малолетни постапката е во тек.

Доколку преземете содржина од оваа страница, во целост сте се согласиле со нејзините Услови за користење.