Трпчески премиерно го изведе „Македонисимо“ пред германската публика

Германската публика во германскиот град Лудвидсбург имаше можносто во четвртокот вечерта премиерно да го слушне новиот проект на светски прославениот македонски пијанист Симон Трпчески насловен „Македонисимо“ со музика од Македонија.

Освен на пијано, Симон Трпчески свиреше и на хармоника, па дури и запеа. Бувчанско, Малешевка, Црногорка, Беранче, Велигденско, Пелистерско, Поступано, но и Филка мома, Чие е она девојче…, во препознатливите македонски ритми, аранжирани во соработка со македонскиот композитор Панде Шахов беа изведени со тимот во чиј состав беа Александар Краповски на виолина, Александар Сомов од Бугарија на виолончело, Хидан Мамудов на кларинет, саксофон и на кавал и Влатко Нушев на удиралки.

„Ептен македонско“, како што во шега знае да каже носителот на нашиот културен идентитет во светот, наиде на овации кај пребирливата фестивалска публика, соопшти „КултурОп“ со поддршка од Министерството за култура на Република Македонија.

Трпчески за Македонското радио изјави дека едвај ги чека следните изведби на проектот за кои се надева дека ќе наидат на добар прием кај публиката.

„Луѓето беа одушевени и мене ми е исклучително драго што на овој начин се заокружи овој проект што вклучува сплетови од македонски ора со неколку песни кои и носат шарм на целата инструментална димензија од 80 минути музика. Искрено се радувам и едвај ги чекам следните изведби на проектот и се надевам дека насекаде низ светот каде што ќе успеам да го претставам ќе наиде на убав прием кај публиката“, рече Трпчески.

На 6 јули проектот „Македонисимо“ ќе биде изведен пред словенечката публика во Љубљана.

Доколку преземете содржина од оваа страница, во целост сте се согласиле со нејзините Услови за користење.