Турски суд му нареди на Фејсбук да блокира повеќе интернет страници, на кои според негово мислење, се навредува пророкот Мухамед, заканувајќи се дека доколку не го направи тоа, ќе го блокира пристапот до оваа социјална мрежа, пренесе МИА.
Судскиот налог, кој е издаден вчера, следува по барање на Обвинителството. Засега нема коментари од претставниците на Фејсбук.
Ова е последен потег на турските власти во реакциите околу навредите на верските чувства на муслиманите, како што тие го доживејаа објавувањето на карикатурите на пророкот Мухамед во францускиот сатиричен неделник „Шарли ебдо“.
Турскиот претседател Реџеп Тајип Ердоган претходно предупреди на „судир на цивилизациите“ по серијата напади од страна на милитантни исламисти во Париз, додавајќи дека зад нападите на „Шарли ебдо“ се кријат напади врз исламот.
Премиерот Ахмет Давутоглу изјави дека слободата на медиумите, не му дава никому право да навредува, опишувајќи го објавувањето на карикатурите како „голема провокација“.