Одделението за недозволена трговија со дрога при СВР-Скопје поднесе кривична пријава против 37-годишниот скопјанец А.Г. осомничен за недозволено производство и пуштање во промет наркотични дроги.
На А.Г. му е изречена мерка притвор во траење од 30 дена, а во полицијата е евидентиран и за други кривични дела.
Како што соопшти МВР, тој лани и оваа година неовластено од непознато лице набавил неодредена количина марихуана, која ја чувал во викенд куќа на неговиот татко во село Раштак, ја препакувал во својот дом и во близина ја вршел продажбата. На 24 јуни биле претресени неговиот дом и викендичката во Раштак, при што биле откриени и одземени една дигитална вага и 755,9 грама марихуана.
Од 1992 до 2007 против А.Г. биле поднесени 10 кривични пријави за сторени кривични дела: „противправно лишување“, „загрозување на сигурноста“, „загрозување на безбедноста на сообраќајот“, „напад на службено лице при вршење работи на безбедноста“, „кражба“ и „тешка кражба“, при што за дел од нив изречени му се мерки „задолжително психијатриско лекување“, казни затвор и парична казна.