Кон крајот на јануари, Советот на Европската асоцијација на универзитети (ЕУА) донесе одлука Универзитетот „Гоце Делчев“ од Штип да добие членство во оваа организација. Оваа е големо достигнување за меѓународната репутација и препознатливост на Универзитетот.
Со добивањето на членството во оваа меѓународна организација, на Универзитетот „Гоце Делчев“ му се отвораат вратите кон сите информации поврзани со европското високо образование и соработката со европските универзитети.
Со потпишувањето на членството УГД ќе добие пристап до базата на ЕУА и ќе има можност за соработка на научни проекти со универзитетите од организацијата. Со 850 универзитети од 47 држави ЕУА е најголемата и најсеопфатната организација која ги претставува универзитетите во Европа.
Оваа организација опфаќа 17 милиони студенти од сите членки, меѓу кои сега и студентите од УГД. ЕУА го застапува интересот на европските универзитети и ги обединува во една заедничка цел, а тоа е подобро и поквалитетно високо образование во Европа. ЕУА, исто така, влијае и на промените на високото образование на глобално ниво, на менување на политиките на образование и приспособување на модерните трендови.