Свет

Украина ќе добие 100 милиони евра заем од Полска

Украина ќе добие 100 милиони евра заем од Полска

Украинскиот претседател Петро Порошенко изјави дека Полска ќе и додели на Украина заем во износ од сто милиони евра за модернизирање на енергетскиот сектор и за подобрување на граничната контрола.

Половина од кредитот, односно 50 милиони евра ќе бидат искористени за подобрување на работата на граничните премини, додека другата половина за модернизирање на термоелектраните, прецизираше Порошенко.

Тој нагласи дека украинските власти треба да ја вратат контролата врз државната граница на исток.

Украинскиот и полскиот претседател се договориле двете земји да организираат заеднички воени вежби.

Порошенко изјави дека Украина на претстојниот самит на Источното партнерство, следниот месец во Рига ќе постави две прашања, за признавање на европската перспектива на Киев и за укинување на визниот режим на ЕУ за украинските граѓани од 1 јануари.

Полскиот претседател од вчера е во официјална посета на Украина, а денеска тој ќе се обрати пред украинскиот Парламент.