Челниците на Украинската кошаркарска федерација се откажаа од организацијата на Европското првенство во 2015 година. Оваа одлука се должи на длабоката политичка криза во која се најде земјата, и се надеваат дека ќе бидат способни да учествуваат во изборот за домаќинлукот на веќе следното европско првенство кое е на програмата во 2017 година.
„Не можам ни да замислам како би можеле да продолжиме со подготовките за турнирот во вака тешки економски и политички услови. Оваа кризна ситуација од која дел е и Русија со својата агресија кон нас не натера да им се посветиме на приоритетите во овој миг и да го сочуваме нашиот територијален интегритет. Сосема е јасно дека ниту временски, ниту пак финансиски можеме да постигнеме да бидеме подготвени навреме“, изјави директорот на Евробаскетот 2015, Маркијан Лубкивски.
Моментно Франција е најсериозен кандидат за преземање на организацијата на Евробаскетот следната година, а во игра се уште и Грција, Србија, Белгија, Холандија, Германија, Хрватска, Австрија и Чешка.