Владата го одзема корисничкото право на Министерството за култура за користење на земјиштето наменето за изградба на црква на плоштадот Македонија и го задолжи министерството да ги стопира сите активности за изградба на црквата, а целокупната документација да ја отстапи на Македонската православна црква. Со ова решение, соопштуваат од извршниот дом, се овозможи Министерството за транспорт и врски, согласно законските овластувања, истото земјиште да го даде на МПЦ, од која ќе зависи во целост продолжувањето на понатамошните активности, и надлежноста по ова прашање.

Во однос на иницијативата за обнова на Бурмали џамијата, тргнувајќи од фактот дека урбанистичкото уредување на земјиштето е во надлежност на општина Центар, Владата заклучи дека доколку општина Центар изврши измена на урбанистичкиот план, со цел промена на маркицата во правец на изградба на верски објект - џамија, Владата ќе ја почитува одлуката на општината.

Покрај ова, од Владата информираат дека Исламската верска заедница повеќе од една деценија бара земјиште за изградба на сопствена резиденција и библиотека, а Министерството за транспорт и врски работи на изнаоѓање на такво земјиште кое би било дадено на ИВЗ, откако би се завршиле сите правни и законски процедури.

Автор на веста: Нетпрес
Објавена на 26.06.2009 15:52:45