Украинските воено-полициски сили го бомбардираат аеродромот во Доњецк на истокот на земјата. Претставници на самопрогласената Доњецка Народна Република тврдат дека украинската војска напаѓа со седум хеликоптери и четири авиони, јавуваат руските медиуми.
Хеликоптерите врз доњецкиот аеродром Сергеј Прокофјев, кој е под контрола на проруските бунтовници испукале ракети, наводно како одговор на противвоздушниот оган од земјата, и погодиле цели во близина на пистата, што предизвикало црн чад над аеродромот. Борбата за аеродромот траела околу три часа и била жестока и драматична, но аеродромот останал под контрола на бунтовниците.
Престрелката на аеродромот почнала непосредно по изјавата на победникот на претседателските избори во Украина Петро Порошенко, дадена на прес-конференцијата Киев, дека нема да преговара со „терористите“ во источна Украина.