И оние професионалните војници кои веќе се ослободени од служба на Армијата најверојатно ќе добијат можност да бидат вработени во државна администрација, откако вчера Извршниот комитет на ВМРО ДПМНЕ им даде на своите пратеници во парламентот да направат вакво проширување на опфатот на измените и дополнувањата на Законот за служба во АРМ.
„На вчерашната седница на Извршниот комитет на ВМРО–ДПМНЕ, донесовме одлука со која се даде насока на пратеничката група на нашата партија во Собранието, во процесот на собраниската процедура, на носење на измената и дополнувањето на Законот на Служба во АРМ, со која што се предвидува професионалните војници во служба на Армијата на Република Македонија по наполнување на 45 години старост како максимална старосна граница, да се вработат во државните институции, да го прошири опфатот на професионалните војници и оваа мерка да важи ретроактивно за оние кои службата во Армијата им престанала по основ на исполнување на максимална старосна граница“, вели Емил Димитриев, член на Извршниот комитет на денешната прес конференција.
Оваа мерка ќе важи за поранешните професионални војници кои заклучно со 31 декември 2013 година биле невработени.
Димитриев истакнува дека во мандатот на владеење на ВМРО–ДПМНЕ, за Армијата се случија две покачувања на старосната граница на професионални војници, 2007 година од 35 на 38, 2012 година од 38 на 45. Сега го решаваме егзистенцијалниот статус на војниците по 45 години со ретроактивно дејство. За првпат Армијата се облече во Македонска униформа, се покачија платите на вработените, инвестиравме во касарните и полигоните за обука, се отвори Воената Академија која претходно беше затворена, се отвори модерна школа за пилоти и други позитивни работи кои го јакнат имиџот и капацитетот на Армијата како синоним за државноста.
