Македонија

ВМРО-ДПМНЕ објави јавен повик за кандидати за градоначалници за локалните избори 2017

ВМРО-ДПМНЕ објави јавен повик за кандидати за градоначалници за локалните избори 2017
Водејќи се од принципот на транспатентност и отчетност, ВМРО-ДПМНЕ денес преку дневните весници објави јавен повик за кандидирање на кандидати за градоначалници за локалните избори кои ќе се одржат во 2017 година. Кандидатурите ќе може да се поднесуваат најдоцна до 20 септември.

Повикот се однесува на сите 81 општини во државата. Во истиот е наведено дека кандидат за градоначалник може да биде секој граѓанин кој ги исполнува условите за кандидирање пропишани со Устав и закон, да е член на ВМРО-ДПМНЕ или граѓанин кој не е член на ниту една политичка партија, но се согласува и ги поддржува политики, идеологијата, заложбите и програмата на ВМРО-ДПМНЕ.

-Потребно е заинтересираните кандидати да поседуваат углед, авторитет и морален дигнитет во местото каде живеат и работат, односно во општината за која аплицираат. За поднесување на кандидатурата не се потребни потписи, туку доставување на стандардизирана биографија со фотографија на не повеќе од 3 страни, детална програма за работа на општината на не повеќе од 5 страни со конкретни проекти, мерки и идеи, за која се поднесува кандидатурата, како и пополнување на стандардна аплицијација, стои во повикот од владејчката партија.

 

По доставувањето на кандидатурата, секој кандидат дополнително ќе биде контактиран од партиското седиште и со него ќе биде извршен разговор од страна на Специјална комисија која за таа цел ќе биде формирана.

28 08 2016 Gradonacalnici 2017 KOREGIRANO

По повикот се наведува дека сите кандидати имаат поддеднакви шанси да бидат избрани во зависност од личните квалитети и успеси во минатото, како и визијата за иднината.

-ВМРО-ДПМНЕ продолжува со својата пракса низ максимално транспарентна процедура и преку активно учество на граѓаните да се изберат најсоодветните кандидати за градоначалници. Идејата на ВМРО-ДПМНЕ е да ги обедини сите граѓани околу мотивот за создавање на силни и просперитетни општини во Република Македонија, стои во јавниот повик на партијата.

Инаку, сите заинтересирани лица потребната документација може да ја подигнат од седиштето на партијата во архивата секој работен ден од 12 до 16 часот или пак на веб страната www.vmro-dpmne.org.mk. Пополнетите материјали треба да се достават до партиското седиште.