Македонија

ВМРО-ДПМНЕ: Рашковски лаже, врши мобинг и прави хајка

ВМРО-ДПМНЕ: Рашковски лаже, врши мобинг и прави хајка

Драги Рашковски изнесува очигледни лаги, дезинформации и лесно доказливи манипулации, обвинуваат од ВМРО-ДПМНЕ.

-Дрско лаже дека наводно биле злоупотребени милијарди, а во целото интервју манипулира со неколку случаи чија вкупна вредност е неколку десетици илјади евра, лажно преставувајќи ги за некаков криминал. Еве јавно го повикуваме да каже од каде ги најде тие милијарди, како стигна до таа сума, кој ги злоупотребил и кои се тие случаи? Доколку тоа јавно не го соопшти ќе стане јасно како и за се друго дрско и отворено манипулира во јавноста, дава паушални оценки. 6 месеци е на функција, а Рашковски наместо да се зафати со работа тој се занимава со измислици за ВМРО-ДПМНЕ. Но во тие 6 месеци не заборави својата баба да ја постави за претседател на второстепената владина комисија, адвокатското биро за кое медиумите пишуваа дека е раковедено од неговиот кум да биде ангажирано од Генералниот Секретаријат и да добива илјадници денари надомест, иако во владата постои правна служба, како и себе си да се намести за владин преставник, а подоцна и претседател на Собранието на Телеком за што добива надомест од 500 евра по седница, стои во соопштението на ВМРО-ДПМНЕ.

Од партијата велат дека Рашковски покажува лажна загриженост, а во владата вработени се над 40 учесници на „Шарена револуција“.

-Што се однесува до вработувањата во влада освен хајката која што ја прави Рашковски на помалите етнички заедници базирана на невистинити и неточни информации, тој е познат и по мобингот, нечовечкиот третман и иживувањето кој го врши на актуелните вработени. И кога збори за темата вработување добро е да каже по кој основ и компетенции се ангажирани над 40 лица во владата сите учесници од шарената револуција, кој критериум го исполнија и колку државата одвојува за нив на месечно ниво? И најпосле бидејќи Рашковски покажува лажна загриженост јавно го прашуваме зошто ги игнорира над 3.000 вработени во Секретаријатот за Рамковен договор кои според прес конференции на самата СДС, но и јавни признанија од владиниот сектор, земаат плата, а не одат на работа, дали ќе покрене кривична пријава или ќе продолжи тоа јавно да го толерира?