Во Грција недостасуваат 12.000 наставници

Денеска во Грција официјално почна учебната година за учениците во основното и средното образование, но со недостиг од 12.000 наставници, јави дописникот на МИА од Атина.

Учениците денеска ќе ги добијат книгите и ќе се запознаат со нивните наставници, а во исто време синдикатот на наставниците во основното образование соопшти дека недостига кадар за околу 12 илјади работни места.

Министерството за образование соопшти дека од  1 септември се вработени 4.900 наставници на замена како дополнување на вкупно 127.033 наставници. До крајот на месецов ќе бидат вработени уште 10 илјади наставници на замена, а подготвени ќе чекаат уште илјада.

Грчката полиција соопшти дека во училишта низ целата земја ќе се воведе интегриран систем за безбедност со цел заштита на учениците. Тоа значи 24-часовен надзор од страна на тајни агенти за спроведување на законот, како и редовни патроли на моторизираните единици ДИАС. Полицијата исто така ќе интервенира при проверки на безбедноста на училиште автобуси, инсталациите, како и со цел спречување на криминал.

Министерството за образование соопшти и дека, покрај сето ова, училишните кантини редовно ќе се проверуваат дали се во согласност со здравствените прописи.

 

Доколку преземете содржина од оваа страница, во целост сте се согласиле со нејзините Услови за користење.