Големо свлечиште се појави на патот од виничкото село Истибања до Македонска Каменица. Заменик директорот на ЈП „Македонија пат“, Кире Коцев вели дека патот е затворен, а екипите на Македонија пат веќе работат на санирање на свлечиштето.
– Има голема количина на материјал, по наша слободна проценка некаде околу 1 000 метри кубни. Македонија пат со своите екипи е на лице место, мобилна е имаме дежурства 24 часа. Патот е затворен и веќе се работи и чисти од двете страни. Се надеваме дека денеска најдоцна до утре ќе го пуштиме патот за сообраќај – вели Коцев.
Тој додава дека патниците и возачите кои патуваат за Делчево и Македонска Каменица ги пренасочуваат преку патот од Виница за Берово. Забележува дека на оваа делница има опасност од одрони, поради обилните врнежи од дожд.
– Временските услови си го направија своето, има презаситеност на земјата со влага и доведе до овие причини. На оваа делница веќе еден месец ние постојано интервенираме – вели Коцев.
Пред два дена исто така имаше голем одрон на овој пат, кој беше саниран од страна на екипите на ЈП „Македонија пат“. Коцев апелира возачите внимателно да возат и на патот од Виница кон Берово и од Берово кон Струмица, бидејќи има појава на помали одрони од камења и земја.
Извор: Република.мк
Доколку преземете содржина од оваа страница, во целост сте се согласиле со нејзините Услови за користење.