Балкан

Вонредна состојба во цела Србија, во поплавите досега загинаа пет лица

Вонредна состојба во цела Србија, во поплавите досега загинаа пет лица

Бројот на жртви во поплавите што во среда и четврток ја зафатија Србија се искачи на пет, а околу 700 луѓе се евакуирани, објави српската телевизија Б 92.

Владата на Србија прогласи вонредна состојба на територија на цела држава.

Како што дознава Б 92, во поплавите настрадал Д.Л. (42) од Тополе, кој загинал во спасувачка акција на реката Јасеница, а кој се водеше како исчезнат. Две лица загинале во Лајковац, и по едно лице во Белград и Нови Сад.

Во цела Србија состојбата е алармантна, Ибарската магистрала и повеќе патни правци се затворени за сообраќај, а нивоата на реките продолжуваат да растат.

Според премиерот Александар Вучиќ ова е најголема катастрофа во историјата на Србија, пренесува Блиц.

Без електрична енергија, според српската телевизија Б 92, досега останале 100.00 домаќинства, а наставата е откажана во 400 училишта во државата.