Најмалку четири лица загинаа, а четиринаесет се ранети во вооружениот напад кој се случи денеска во Канзас.
Инцидентот се случил кога вооружен маж започнал да пука врз свои сограѓани и колеги во фабриката за косилки за трева „Ексел индастриз“, во која работел.
Напаѓачот е идентификуван како Седрик Форд (38), кој пак бил застрелан во пресметка со полицијата.
Засега не се познати мотивите за овој инцидент, освен што полицијата ја отфрла можноста дека станува збор за терористички напад.
Форд прво почнал да пука во градот Њутон, ранувајќи еден камионџија и еден случаен минувач, а потоа се упатил кон фабриката.
Првата жртва била едно лице кое го затекнал на паркингот, а втората жртва била убиена на влезот од фабриката.
Полицијата тврди дека бројот на жртвите може да се зголеми, затоа што неколкумна од повредените се наоѓаат во критична состојба.
Неговите колеги од фабриката се изнендани од постапката на Форд, за кого велат дека го познавале како „мирен и трпелив човек“.
Трагичниот инцидент во Канзас, доаѓа помалку од една недела, откако во сојузната држава Мичиген во сличен ваков инцидент вооружен маж уби шест лица и рани две други.
