Втор меѓународен ликовен симпозиум „Струга 2018“

Околу 40 уметници од 20 држави во светот од денеска до 23 јуни ќе учествуваат на вториот меѓународен ликовен симпозиум „Струга 2018“, што го организира Здружението за уметност и култура „СИЛИНДАРТ“ со финансиска поддршка на Министерството за култура на Република Македонија и општина Струга.

Покрај сликањето, предвидена е и тркалезна маса на која учесниците ќе дискутираат за состојбата на ликовната уметност, предностите и недостатоците на ликовните симпозиуми и колонии, а ќе бидат усвоени и конкретни заклучоци и препораки.

Куратор на симпозиумот е уметникот Бурхан Ахмети, а координатори Верим Зендели, Теута Хоџа Имери и Кристина Затуровска. Меѓу другите ќе учествува и познатиот мозаичар Саимир Страти, носител на десет Гинисови рекорди за мозаици, а, како што најави организаторот, ќе учествува и еден вајар, кој од камен прави уметнички дела.

Уметниците со своето ликовно творештво ќе имаат можност да се инспирираат од убавините на Струга и да ги преточат на платно создавајќи уметнички дела, а ќе дадат свој придонес и за развојот на туризмот. Освен од Македонија, своето творештво ќе го претстават и ликовни умтници од Америка, Италија, Јапонија, Малта, Франција, Словачка, Романија, Украина, Белгија, Австралија, Словенија, Хрватска, Црна Гора, Бразил, Србија, Велика Британија, Турција, Косово и Албанија.

Вториот меѓународен ликовен симпозиум „Струга 2018“ е можност за стружани и гостите да ги следат уметниците во креирањето на делата, кои ќе бидат прикажани на изложба на 22 јуни во просториите на хотел „Солферино“.

Здружението за култура и уметност „СИЛИНДАРТ“ има организирано повеќе значајни меѓународни настани во Гостивар, Тетово, Струга и Скопје.

 

Доколку преземете содржина од оваа страница, во целост сте се согласиле со нејзините Услови за користење.