Балкан

Вучиќ: Време е да се престане со прекројување на границите на Балканот

Вучиќ: Време е да се престане со прекројување на границите на Балканот

Српскиот премиер Александар Вучиќ денеска изјави дека е добро што ЕУ реагираше на изјавата на албанскиот премиер, Еди Рама, за можно обединување на Косово и Албанија, иако, како што забележа, Унијата „тоа го направи срамежливо“, пишува МИА.

– Крајно време е да се престане со прекројување на границите на Балканот – рече премиерот Вучиќ, пренесува Танјуг.

Премиерот пред новинарите во Крупањ, каде присуствуваше на отворање на фабриката за текстил „Џинси“, наведе дека Србија ќе продолжи со мирољубивата политика, но дека не може да премолчи на стотиците изјави со ваква соддржина.

– Затоа вчера реагирав и кажав дека навистина е крајно време да се престане со прекројување на границите, да се престане со нешто што ќе ги загрози и стабилноста и мирот на Балканот. Добро е, иако е срамежливо тоа што ЕУ го направи, што реагираа на каков било начин. Ние и натаму ќе бараме добри односи со Албанија и ќе инсистираме на тоа, но во секој момент јасно ќе им ставиме до знаење што е тоа што може, а што е тоа што не може да пројде на Балканот – рече Вучиќ.

Изјавите на премиерот на Албанија, Еди Рама, и на косовскиот министер за надворешни работи, Хашим Тачи, за обединување се неприфатливи провокации и не се во согласност со политиката на соработка во регионот, соопшти портпаролката на Европката комисија, Маја Коцијанчич.