На прашањето како може да се пронајде решение во кое граѓанин ќе аплицира на својот јазик во Струмица, Берово или Делчево и дали тоа значи дека администрацијата во Струмица, Берово или Делчево треба да биде двојазична, Фрчкоски вели дека тоа значело оти ќе има служба за преведување, која ќе го преведува тоа.
Видете, мултикултурната демократија е скапа работа, вели Фрчкоски и притоа зборува за некаков проект за вистинско етаблирање на мултикултурното општество, ако почнеле да се менуваат книгите по историја, “околу нашата и албанската историја или заедничката историја во Македонија“.
Прашањето кое произлегува од изјавата на Фрчкоски е дали тоа значи и дека ќе се вработуваат Албанци преведувачи и ќе се населуваат во сите градови каде што немало Албанци претходно?
-Со Заев договоривме албанскиот јазик да го има на парите, изјави синоќа во емисијата „Патот кон“ на Алсат- М телевизија портпаролот на ДУИ, Бујар Османи.
На прашањето дали албанскиот јазик ќе биде официјален на банкнотите, Османи рече:
–Како член 8 од овој закон, и банкнотите и монетите ќе бидат на албански…
Проценката е дека доколку се менува изгледот на парите, станува збор за трошок од околу 20 милиони евра, за печатење на нови пари, изработка на решешија, заштита…
На ставовите на Османи и Фрчкоски реагираше универзитетската професорка Билјана Ванковска која се согласи дека мултиетничката демократија била скапа работа, но прашањето е дали македонските граѓани со албанска националност ќе бидат побогати ако парите бидат двојазични (како што откри Бујар Османи)?
–Дали сите ќе бидеме побогати и посреќни ако се воведат и нови институции, инспекторати и казнени мерки за непочитување на албанскиот јазик? Една работа е да им овозможиш на граѓаните употреба на мајчиниот јазик за да си ги остварат личните права, ама друга работа е за инает или со задни намери да ја менуваш конституцијата на државата! Се разбира, и јас не сум го видела целиот закон и што тој точно предвидува, но ако БУјар зборува за „член 8“ од Законот кој го напишале исклучиво албанските партии и кој не бил предмет на преговори, бидејќи бил УСЛОВ за коалицирање, тогаш 20 луѓе го киднапирале Парламентот, а оние 100 се само папети кои треба да изгласаат нешто напишано од Осман Кадриу и одобрено од неколку албански партии, напиша Ванковска.
Размислувам, додава Ванковска, зарем не е понижувачки за Албанците тоа што како голема победа на ДУИ (која беше фактички поразена токму од мнозинството Албанци) се претставува внесување на албански називи за парите, полициските и армиските ознаки, и сл.?
–Нели тоа ги прави неуки – демек само тие воопшто не го знаат македонскиот јазик, јазикот кој го знаат сите останати 75% од населението? И така, наместо декриминализација на власта, сега ќе имаме албанизација по скапа цена – и во смисла на буџетски издатоци и во смисла на продлабочување на сегрегацијата и нетрпеливоста, пишува Ванковска.
