среда, 29 март 2017  |  Вести денес: 52

За средните стручни училишта достапни 700.000 евра

ristovski-1-640x360

Последни вести

Вкупно 43 средни стручни училишта со 110 предлог-проекти аплицираа на јавниот повик што го објави Министерството за образование и наука, во рамки на „Проектот за развој на вештини и поддршка на иновации“ што се спроведува со поддршка на Светска банка. Се работи за грант програма, вредна 700.000 евра, ова на денешната прес-конференција го соопшти заменик-министерот за образование и наука Спиро Ристовски.

– Во рамки на „Проектот за развој на вештини и поддршка на иновации“, кој го имплементираме со поддршка на Светската банка, на почетокот на годинава најавивме и почнавме со спроведување една исклучително значајна стимулативна мерка во насока на поврзување на средните стручни училишта со бизнис заедницата. Целта е унапредување на практичните вештини и знаења на учениците и создавање квалитетен кадар, подготвен за настап на пазарот на трудот веднаш по завршување на средното образование или подготвен за натамошна образовна надградба за која би имал солидна, средна стручна основа, рече Ристовски.

Тој информира дека се работи за неповратни средства кои се предвидени да бидат доделени за финансирање проекти на средните стручни училишта во државата, изработени во партнерство со некоја компанија, со крајна цел – зајакнување на нивната меѓусебна соработка и унапредување на практичната настава и вештините за вработување на учениците.

Ристовски потсети дека на почетокот на април годинава објавиле јавен повик за доделување неколку типови грантови во висина од 5.000 до 20.000 евра. Средствата наменети се за финансирање проекти за реализација на практичната настава во рамки на училиштата, за организирање кампови за техничка обука за време на летен распуст, курсеви за практична обука во училиштата, за проекти за реализација на практична настава во компаниите – директно на работно место, за проекти за основање реални училишни компании…

Во меѓувреме, како што рече, за сите 75 јавни средни стручни училишта беа организирани обуки по региони, заради правилна подготовка на апликацијата и нејзино навремено поднесување.

– На овој јавен повик, кој беше отворен заклучно со 15 мај, аплицираа 43 училишта, со вкупно 110 предлог-проекти. Сите пристигнати апликации беа предмет на евалуација од страна на посебна комисија формирана специјално за оваа намена, составена од претставници на Министерството, но и на стопанските комори, во интерес на транспарентноста, истакна Ристовски.

Согласно критериумите на грант програмата, како што рече, комисијата одлучи да бидат прифатени 54 предлог проекти, чие финансирање ќе се реализира етапно, во неколку фази ќе им бидат трансферирани средства на самите училишта.

– Ќе бидат финансирани првите 10 најдобро рангирани проекти, за кои во текот на август ќе бидат префрлени средства на самите училишта, а реализацијата ќе почне со почетокот на учебната година. Како надлежна институција ќе ја следиме имплементацијата тековно и ќе укажуваме на извесни потреби од промени или корекции, согласно прирачникот, кој за оваа намена го изработивме заедно со Светска банка. Потоа ќе следат уште неколку фази во кои ќе бидат спроведени и сите останати 44 проекти, за кои е донесена одлука да бидат финансиски поддржани, потенцира Ристовски.

Заменик-министерот за образование, наука и спорт упати благодарност до сите средни стручни училишта кои изразиле интерес за оваа мерка и аплицирале на јавниот повик, како и до компаниите-партнери на училиштата за покажаната општествена одговорност во поддршката на образовниот процес. Најави дека оваа мерка ќе продолжи да се имплементира и следните години.

Најчитани вести