Заев посакува трговијата со Турција да достигне милијарда евра

Постојат можности за унапредување на економската соработка меѓу Република Македонија и Република Турција, констатирано е заеднички на вечерата на премиерот Зоран Заев со бизнисмени од Турција, организирана во неделата вечерта во Анкара, од ТОББ (TOBB) – Сојузот на стопански комори и берзи на Република Турција.

„Тука сме да пренесам отворена покана за инвестирање во Македонија. Свесен сум дека мојата земја ќе има напредок ако се развиваат приватниот сектор и инвестициите. Сакам да ви пренесам дека постои амбиент за инвестирање во нашата земја. Со околу 35 инвеститори сме пред договор, со 10 имаме потпишано договори, а има 100-ци заинтересирани“, рекол премиерот Заев пред бизнисмените од Турција.

Посочил дека Турција е шеста земја по големина на инвестиции во Македонија, дека 456 милиони евра е трговската размена и порача дека со перспективите за поголема соработка, може да има и поголем профит за компаниите и нови работни места за граѓаните на Македонија.

„Нашата цел е за неколку години трговијата со Турција да биде една милијарда евра“, рекол Заев.

Го истакнал на еднаквиот третман што го има новата влада кон странските и домашните инвестиции, олеснувањата кај данокот на добивка и персоналниот данок, годишниот буџет од 55 милиони евра за секоја инвестиција во домашното стопанство.

Како области за продлабочување на соработката ги наведе земјоделството, енергетиката, градежништвото. Премиерот рече дека правна регулатива за соработка меѓу двете држави има, но дека ќе има унапредување на постојните договори, како тој за слободна трговија, што е едно од очекувањата на бизнис заедницата во Турција.

Потпретседателот на ХОББ, Фаик Јавуз, порачал дека Турција и Македонија се големи пријатели и дека тие, како граѓани и како бизнис заедница ја поддржуваат Македонија во нејзиниот развој.

„Има околу 100 турски инвестиции во Македонија, но има уште многу што да се направи. Македонија се наоѓа во срцето на Југоисточна Европа, цели кон ЕУ, работи на тој пат, тоа значи отворен пазар и од 650 милиони луѓе“, реколе потпретседателот на ХОББ, Јавуз, охрабрувајки ги бизнисмените за инвестиции во Македонија.

Како што информираат од владината прес служба, тој му честитал на премиерот Заев за новата позиција и оценил дека Република Македонија „треба да биде среќна што има динамичен премиер кој ќе остави белег со своето работење“.

Заев во име на граѓаните на Македонија се заблагодарил за искрениот пријател што го имаат во граѓаните на Турција.

На средбата зборувал и министерот без ресор задолжен за странски инвестиции, Аднан Ќахил, кој најавил максимална поддршка за зголемување на економската соработка. Било дискуситирано со заинтересираните бизнисмени кои на премиерот Заев му доделиле плакета како благодарност за отворената соработка.

Заев од неделата вечерта престојува во официјална посета на Турција, придружуван од министерот без ресор задолжен за странски инвестиции, Аднан Ќахил, пратениците во Собранието на Република Македонија, Енес Ибраими и Јусуф Хасан и државниот секретар во министерстовто за надворешни работи, Виктор Димовски. Премиерот, за време на посетата на Анкара ќе има средби на највисоко владино и државно ниво.

Доколку преземете содржина од оваа страница, во целост сте се согласиле со нејзините Услови за користење.