Запленети цигари, свежо овошје, стоматолошки материјали, фалсификати

Во текот на минатата недела и викендот, царинските службеници открија повеќе обиди за криумчарење стока, при што привремено се задржани цигари, овошје, додадоци на исхраната и козметички производи, стоматолошки материјали, текстилни производи и фалсификати.

Царинската управа запленила вкупно 131 штека цигари, од кои 125 штеки  Pall Mall и Monte Carlo со македонски акцизни маркички  и 6 штеки Fast и Karelia blue без акцизни маркички, откриени на граничниот премин Дојран, во соработка со полициската служба на преминот, при контрола на патничко моторно возило со грчки регистарски таблички, управувано од грчки  државјанин, пријавено за излез од државата. Непријавените цигари биле сокриени во специјално изработен бункер под патосот на возилото.

На граничниот премин Табановце автопат, при контрола на патничко моторно возило со српски регистарски таблички, управувано од српски државјанин, пријавено за излез од државата биле откриени 49 штеки цигари MONTE CARLO blue, PALL MALL 100S и LD violet, со македонски акцизни маркички. Непријавените цигари пронајдени се во две црни торби, сместени во багажникот, во просторот за резервна гума и во внатрешноста на вратата од багажниот простор на возилото.

На царинската испостава Гевгелија, при контрола на товарно моторно возило со македонски регистарски таблички, биле откриени   1.112 килограми банани со потекло од Мексико, пријавени за увозно царинење. Стоката била наменета за фирма увозник од Струмица.

При контрола на патните торби на двајца македонски државјани кои допатувале со лет од Истанбул на скопскиот аеродром Александар Велики биле откриени 29,5 килограми HERBALIFE-додатоци за исхрана, 990 милилитри HERBALIFE креми 1.230 HERBALIFE таблети и 600 грама чај Herbal Tea Concentrate .

На граничниот премин Јажинце, при контрола на патничко моторно возило со македонски регистарски таблички, управувано од македонски државјанин, под совозачкото седиште на возилото биле откриени 17 паковки стоматолошки материјали – пластелин Kuprovent N, глазура AKZ 25 VITA5g и прашок за порцелански заби VITA  Enamel  50 g, VITA  Opaque Dentine 50 g, VITA  Cervical 12 g и VITA  Margin 12 g .

Во два одвоени случаи на граничниот премин Блаце, при контрола на две патнички моторни возила, управувани од македонски државјани, биле откриени 88 готови текстилни производи (машки кошули и женски јакни.

Во првиот случај, при контрола на патничко возило со косовски таблички, во багажниот простор пронајдени се 73 машки кошули, додека во вториот случај, при контрола на патничко возило со македонски таблички, позади предните седишта и во багажниот простор на возилото, пронајдени се 15 женски јакни.

Освен тоа, биле запленети и 33.612 паковки (околу 12.150 литри) шампони со ознаки на заштитени трговски марки, откриени на царинска испостава Скопје 2, при контрола на козметички производи и средства за лична хигиена, со потекло од Грција, пријавени за увозно царинење за фирма увозник од Скопје.

– 6.040 готови текстилни производи (машки и женски пижами, хеланки и машки кошули), 312 парфеми и 24 чанти со ознаки на заштитени трговски марки, откриени во три одвоени случаи на граничниот премин Богородица, при контрола на три товарни моторни возила, пријавени за влез во државата.

Во првиот случај при контрола на товарно возило со македонски регистарски таблички, натоварено со разна стока со потекло од Кина, пронајдени се 5.640 готови текстилни производи (хеланки и комплети машки и женски пижами), во вториот случај при контрола на товарно возило со македонски регистарски таблички, натоварено со разна стока со потекло од Турција, пронајдени се 400 машки кошули, а во третиот случај при контрола на товарно возило со турски регистарски таблички, натоварено со разна стока со потекло од Турција, пронајдени се 312 парфеми и 24 чанти, за кои царинските службеници се посомневаа дека повредуваат права од интелектуална сопственост. Во првите два случаи стоката била наменета за фирми увозници од Косово, а во третиот случај стоката била наменета за фирма од Албанија.

 

Доколку преземете содржина од оваа страница, во целост сте се согласиле со нејзините Услови за користење.