Македонија

Започна изградбата на новиот објект на Турски театар

Започна изградбата на новиот објект на Турски театар

До крајот на годината новиот објект на Турски театар – Скопје, кој се гради во близина на Железничката станица треба да има завршена карабина.

Во посета на локацијата , каде денеска беше поставена првата темелна плоча на зградата во која ќе биде сместен театарот, на површина од 2.600 метри квадратни, беше министерката за култура, Елизабета Канческа – Милевска.

Досега интензивно се работеше на ископ на градежната јама, имаше мал застој зашто беа откриени подземни води на местото на објектот каде што се вршеше испумпување и целосна хидроизолација. По завршување на овој процес, се пристапи кон понатамошните градежни активности и денеска, на огромно задоволство, се поставува првата темелна плоча. Кога тоа ќе заврши, ќе се продолжи со карабината на самиот објект кој се планира до крајот на годината да биде целосно завршен, изјави Канческа-Милевска по увидот на градежните работи, пренесува МИА.

Откако ќе биде готова карабината, активностите ќе продолжат во соработка со Турција која, според договорот, ќе се вклучи во останатите фази од изградбата.

Атила Клинче,  директорот на Турски театар – Скопје очекува дека наскоро ќе биде изграден нов објект во кој ќе се пресели ансамблот на Турскиот театар, кој годинава одбележува 65 години постоење.

Јас сум најсреќниот човек денеска зашто толку години работевме на овој проект, прво со експропријација, расчистување на просторот, на имотот. Сега конкретно се гледа, првата темелна плоча веќе се гради и до крајот на годината ќе ја завршиме карабината. Република Турција ќе учествува во изградбата на театарот. Да се надеваме дека работите ќе си течат според  предвидената динамика и дека во најскоро време ќе имаме театар  каде што ќе се случува најважното – претставите, истакна Клинче.

Имено, новиот објект ќе овозможи современи услови за работа. Поранешниот заедничкиот објект му е предаден на Албанскиот театар и се реконструира од темел. Додека траат градежните работи за новите објекти, ансамблите на двата театра своите претстави ги изведуваат на сцената на театар „Комедија“.

 

 

Долги години Турски театар беше во склоп на Албанскиот театар во Скопје, кој се реконструира од темел.