Денеска, официјално заврши оценувањето во рамките на вежбата „Брз Лав -14“ во Кралството Белгија, информираат од Министерството за одбрана.
Во текот на овој ден се реализира и најголемиот предизвик со ангажирање на персоналот на четата во преземање на постапките при демонстрации на цивилно население и формирање на кордон.
Со овој инцидент и официјално заврши оценувањето на штабот и единиците по што беше реализирана парада со единиците учесници на вежбата.
На денот на завршувањето на вежбата во областа Сен Хубер (Saint Hubert) во Кралството Белгија во обиколка на вежбата беше и високиот претставник на Република Македонија при НАТО и ЕУ, бригаден генерал Бранко Дракалски. Генералот Дракалски беше пречекан од највисокиот национален претставник на вежбата, потполковникот Ѓоко Максимов и командирот на четата за заштита на силите ЕУБГ 2014-2 мајор Оливер Данилоски.
Активностите во рамките на вежбата „Брз Лав – 14“ продолжуваат во четврток, 12.06.2014 година. На овој ден е испланиран Ден на високи гости, кога ќе се изврши презентација на постапки, активности и ќе се објаснат тактичко техничките карактеристики на дел од опремата која ја поседуваат единиците, стои во известувањето од Канцеларијата за односи со јавноста при Министерството за одбрана на Република Македонија.
