Иако претходните продажни сесии потврдија дека никогаш не е готово се додека не се потпише договорот и истиот биде ратификуван од Советот на општина Битола, полека се назира крајот на сагата околу фудбалскиот прволигаш Пелистер и неговата иднина.
Клубот веќе еден месец функционираше со преодна управа која требаше да биде најава дека битолската компанија „Цермат“ ќе го преземе раководењето со клубот и заедно со општина Битола во наредните четири години да го водат Пелистер. Но, по понудата од гркот Габриел Папанастасатос, која не наиде на зелено светло, градоначалникот на Битола, Владимир Талески во петокот обелодени дека одлагањето на точката од вонредната седница е поради нова трета понуда. Одеднаш таа трета понуда ја добива фаворитската улога, затоа што битолските компании ЗИК Пелагонија и Пелистерка подготвиле заедничка кандидатура, во која ќе бидат вклучени уште неколку македонски фирми и заеднички ќе го водат Пелистер со откуп на сто отсто од акциите.
Деталите од договорот општина Битола сѐ уште не се изнесени, но се шпекулира дека понудата е убедливо најдобра и финансиски најмоќна, меѓу 300 и 400 илјади евра по сезона. Новите газди ќе инвестираат во сениорската екипа, што е еден вид гаранција за сигурно утре на клубот. Други кадровски промени не се најавени, а веројатно ако ги има ќе бидат направени по официјализацијата.
Сега „топката„ е префрлена кај првите луѓе на градот, кои само за оваа проблематика треба да свикаат нова седница и да изгласаат доверба на најновата понуда. Во меѓувреме единствена добра страна на замрсената ситуација во Пелистер е што има двонеделна пауза заради националната репрезентација и првенството продолжува на 14 септември.
Веќе за мечот со Тетекс под „Тумбе кафе„ зелените би требало да имаат нов управувачки тим.
Sportmedia.mk