Спорт

Ракометна Лига на шампионките ЖРК Вардар преку Битигхајм во четвртфиналето на ЛШ

ЖРК Вардар преку Битигхајм во четвртфиналето на ЛШ

Ракометарките на Вардар во петокот вечерта со сигурната победа над германски Битигхајм со 30:22 (13:8) и со 16 бода го обезбедија првото место во групната фаза од Лигата на шампиониките веќе во 5-то претпоследно коло и се доближија до повторен пласман на „фајнал фоур“ турнирот во Будимпешта.

Вардар важеше за фаворит и пред натпреварот со противникот кого со голема разлика го совладаа на негов терен пред речиси еден месец, а откако гостинките допатуваа во Скопје со десет ракометарки, од кои два голмана, беше јасно дека не би требало да има проблеми.

Вардарки повторно со проблеми го започнаа и овој дуел и не можеа резултатски да се одлепат, и покрај неколкуте водства од два гола предност (4:2, 5:3 7:5), и борените ракометарки на Битигхајм во овој период достојно парираа и успеваа да дојдат до израмнување играјќи цврста одбрана.

По израмнувањето 7:7 во првото 21 минута, конечно на голот профункционира Амандин Лејно која овозможи два лесни гола за Вардар и водство од 10:7. Набрзо во 27 минута домашните ракометарки ја зголемија предноста на 12:8, а на крајот од првиот дел остварија предност од „плус пет“ (13:8).

Второто полувреме започна со силен притисок на Вардар поддржан од Лејно и остварување на највисоката предност дотогаш од 18:11. Во тие моменти веќе се надѕираше конечниот исход од вечерашниот дуел. Во 45 минута „вардарки“ веќе имаа предност од девет голови, што овозможи разигрување и на ракометарките кои добиваат помала минутажа во Лигата на шампионките.

Андреа Лекиќ постигна 8 гола, Сара Ристовска 4, а по три постигнаа Пенезиќ, Радичевиќ и Цвијиќ.

Во последното коло Вардар гостува кај Будуќност во Подгорица.

По третпат главната фаза од ЛШ ЖРК Вардар ја завршува на првата позиција, по сезоната 2013/2014 кога тоа значеше и директен пласман на Ф4 турнирот, и минатата сезона. Сега македонските шампионки го очекуваат исходот од последните две кола од Група 1 каде можни противници се дански НХФ Никобинг, словенечнки Крим и уште еден дански претставник Митјиланд преку кој Вардар мината година се пласираше меѓу четирите најдобри екипи во Европа.