Генералниот секретар на НАТО, Марк Руте ги повика во понеделникoтземјите-членки на НАТО да потрошат повеќе за одбрана од сегашната цел од два отсто од бруто домашниот производ (БДП), поставена пред десет години, велејќи дека тоа сега е премалку поради новите предизвици.
Руте ги даде забелешките во Лисабон по состанокот со португалскиот премиер Луис Монтенегро, кој го повтори своето ветување дека неговата земја ќе ја достигне целта од два отсто БДП до 2029 година. Во 2023 година, Португалија потрошила 1,5 отсто од својот БДП на обврските кон НАТО.
„Знаеме дека целта од два проценти, поставена пред десет години, нема да биде доволна за да се одговори на предизвиците на утрешниот ден. Ова значи дека сега треба да трошиме повеќе за нашата одбрана“, рече Руте.
Земјите-членки ќе разговараат дали да ја зголемат целта од два проценти на самитот во Хаг ова лето, под притисок на американскиот претседател Доналд Трамп да ги зголеми трошоците за одбрана на пет проценти од БДП, што во моментов ниту една земја-членка не го исполнува.
Руте ги повтори западните обвинувања дека Русија наводно се обидува да ги дестабилизира земјите-членки на НАТО преку дејствија „кои се движат од обиди за атентат до сајбер напади и саботажи, додека во исто време води брутална агресивна војна против Украина“.
Москва негира дека сака да ги дестабилизира западните земји и тврди дека нејзините воени операции во Украина се насочени кон зајакнување на нејзината национална безбедност.
