Натпреварите од висок ризик во италијанското првенство следната сезона веќе нема да се играат во вечерните термини вообичаено резервирани за дерби мечевите, одлучи италијанското Министерство за внатрешни работи како одговор на насилството што му претходеше на неделното дерби во Рим.
„Во текот на сезоната 2025/26, натпреварите со висок ризик веќе нема да смеат да започнуваат во вечерните часови, како што се случи со натпреварот меѓу Лацио и Рома“, се вели во соопштението на Министерството за внатрешни работи до Италијанската фудбалска федерација (FIGC).
Според италијанските новински агенции Ansa и AGI, Министерството за внатрешни работи, исто така, им забранило на навивачите на Лацио и АС Рома да присуствуваат на следните три натпреварa на гости на нивните тимови.
Овие најави уследија по жестоките судири меѓу „ултрасите“ на римските клубови и полицијата во пресрет на римското дерби кое заврши нерешено (1:1).
Пред почетокот на натпреварот во 20 часот и 45 минути, околу 500 „ултраси“ на Лацио и Рома се обидоа да ги пробијат полициските бариери поставени околу Олимпискиот стадион за да спречат судири меѓу навивачите на двата тима.
Полицијата го одби налетот на „ултрасите“, од кои некои биле вооружени со железни шипки и чекани, користејќи водени топови. Во судирите се повредени 24 лица, а полицијата уапси тројца навивачи на Лацио и тројца навивачи на Рома, на кои им беше забранет влез на стадионот.
