Цените на акциите пораснаа на Волстрит во четвртокот, главно во технолошкиот сектор, бидејќи инвеститорите беа охрабрени од подобрите од очекуваните квартални деловни резултати од „Microsoft“ и „Meta Platforms“.
Индексот Dow Jones порасна за 0,21 проценти на 40.752 поени, додека S&P 500 порасна за 0,63 проценти на 5.604 поени, а индексот Nasdaq порасна за 1,52 проценти на 17.710 поени.
Растот на индексот S&P 500 осми ден по ред е благодарение на подобрите од очекуваните квартални деловни резултати од повеќето компании во индексот.
Благодарение на ваквите резултати, цената на акциите на „Meta Platforms“ се зголеми за повеќе од 2 отсто, а на „Microsoft“ за повеќе од три отсто, па затоа секторот за технологија и комуникации беше предводник во однос на растот на цените.
„Убаво е да се види дека пазарот е во пораст благодарение на корпоративните приходи и дека шпекулациите за царините се ставени во втор план. Освежувачки е малку да се зборува за корпоративните резултати и економските индикатори за промена“, рече Ламар Вилер, менаџер за портфолио во компанијата „Viller&Co“.
И додека деловните резултати на компанијата се над очекувањата, економските податоци се слаби. Во среда беше објавено дека американската економија неочекувано се намалила во првиот квартал првпат по три години.
Новите податоци, исто така, покажуваат дека бројот на отпуштања се зголемил минатата недела, додека индексот PMI за производствениот сектор дополнително се намалил во април.
Ова се првите индикации за влијанието на царинската војна што Вашингтон ја води со остатокот од светот врз економијата.
