Германија треба да ја забрза изградбата на електрани на гас за да обезбеди снабдување со енергија кога обновливите извори не се достапни, изјави во петокот новата германска министерка за економија, Катерина Рајхе.
„Ни требаат, што е можно поскоро, флексибилни електрани на гас кои можат да нè снабдуваат со енергија кога нема ветер или сонце“, рече Рајхе на самитот Лудвиг Ерхарт во Баварија, три дена откако ја презеде функцијата министерски функционер.
„Мораме брзо да објавиме јавни тендери за електрани на гас со минимален капацитет од 20 гигавати за да ја зачуваме енергетската безбедност“, додаде таа.
Неодамнешниот прекин на електричната енергија во Шпанија покажа, рече таа, колку се важни електраните на гас. За нивната изградба да биде профитабилна, тврди Рајхе, потребни се „долгорочни договори за снабдување со гас“ и реален поглед на енергетската транзиција.
„Исто така, потребно е прецизно да се утврди дали зголемувањето на капацитетот за производство на енергија од обновливи извори во изминатите години било оптимално или сме ги превиделе системските ризици и трошоци од таквата политика“, истакна Рајхе.
„Проширувањето на капацитетите за обновливи извори на енергија нè доближи до целта за климатска неутралност“, тврди Рајхе, но призна дека тоа е со трошоци поради проширувањето на мрежата и тесните грла и затворање на електраните на јаглен и гас.
Оваа анализа ќе биде меѓу мерките што планирам да ги спроведам на самиот почеток од мојот мандат, рече министерката.
Со цел да ја оживее поткелкната германска економијата, новата влада ќе се справи и со цените на електричната енергија, рече Рајхе.
„Треба да го намалиме данокот на електрична енергија и данокот за складирање на гас и да утврдиме цени на електричната енергија за индустриските потрошувачи. Сепак, морам да нагласам дека ова ќе биде исклучително тешко да се постигне во Европа“, истакна таа.
Рајхе ја отфрли можноста за враќање кон нуклеарната енергија, и покрај тоа што партитите CDU и CSU се залагаа за таков потег во изборната кампања.
„Процесот на напуштање на нуклеарната енергија е завршен“, рече новата министерка.
Рајхе, исто така, нагласи дека новите договори за слободна трговија треба да се склучат што е можно поскоро, со оглед на извозната ориентација на германската економија.
„Ова значи дека мора да склучиме релевантни договори за слободна трговија со Чиле, Меркосур (групацијата латиноамерикански земји), Индија, Австралија и Мексико. И, експлицитно нагласувам, ни се потребни и Соединетите Американски Држави“, рече Рајхе.
