Директните разговори меѓу Русија и Украина во Истанбул се очекува да започнат со поздравни зборови од Турција во петок напладне по локално време.
Делегации од Турција, САД и Украина пристигнаа во канцеларијата на претседателот на Република Долмабахче во Истанбул, каде што се очекува нивна трилатерална средба во 10:45 часот по локално време.
Украинската страна ја претставуваат шефот на кабинетот на Володимир Зеленски, Андриј Јермак и министерот за надворешни работи Андриј Сибиха. Преговарачкиот тим на владата во Киев на разговорите со Русија во Турција е предводен од министерот за одбрана Рустем Умеров.
Руската делегација предводена од Владимир Медински пристигна во Турција за да ги одржи првите директни разговори за украинското решение од 2022 година утрото на 15 мај. Руската Федерација на преговорите ја претставуваат и заменик министерот за надворешни работи Михаил Галузин, началникот на Главната разузнавачка управа на Генералштабот на руските вооружени сили Игор Костјуков и заменик министерот за одбрана. Како што истакна Медински, руската делегација ги има сите потребни надлежности и овластувања за водење на преговорите и е посветена на конструктивен пристап, кон изнаоѓање можни решенија и допирни точки. Извор на ТАСС близок до организацијата на преговорите меѓу Русија и Украина објави дека за 12:30 часот е најавена средбата на која ќе учествуваат Турција, Русија и Украина.
На 11 мај, рускиот претседател Владимир Путин предложи да се обноват директните разговори со Украина без никакви прелиминарни услови на 15 мај во Истанбул. Целта е да се решат основните причини за конфликтот и потенцијално да се постигне прекин на огнот.
Портпаролката на руското Министерство за надворешни работи, Марија Захарова, посочи дека има апсолутна логика во изборот на местото: разговорите продолжуваат таму каде што беа прекинати на инсистирање на Обединетото Кралство, кое изврши притисок врз Киев пред три години.
Американскиот претседател Доналд Трамп денеска изјави дека сака да се сретне со рускиот претседател Владимир Путин „што е можно побрзо“, пред денешниот почеток на мировните преговори меѓу Русија и Украина во Истанбул. „Мислам дека е време едниставно да го сториме тоа“, рече во Абу Даби Трамп, кој ја завршува блискоисточната турнеја и се враќа во Вашингтон. Тој вчера рече дека „ништо нема да се случи додека Путин и јас не се сретнеме“.
