Русија во петокот изјави дека нападите на Израел врз Иран биле неиспровоцирани и претставуваат кршење на Повелбата на Обединетите нации, обвинувајќи го Израел за поништување на дипломатските напори за постигнување договор за смирување на загриженоста на Западот во врска со нуклеарната програма на Иран.
Израел започна воздушни напади врз Иран во петокот, таргетирајќи нуклеарни постројки, фабрики за балистички ракети и воени команданти на почетокот на воената операција за спречување на Техеран да изгради атомска бомба.
Според првичните извештаи, нуклеарната централа Бушер, изградена од Русија, не била засегната. Исто така, Меѓународната агенција за атомска агенција (IAEA) извести дека во околината на другите нападнати ирански постројки за збогатување ураниум, како Натанц и Форду, не е регистирано зголемено ниво на радиоактивно зрачење од вообичаеното.
„Русија е загрижена и ја осудува оваа голема ескалација на тензиите меѓу Израел и Иран“, изјави портпаролот на Кремљ, Дмитриј Песков.
Според него, претседателот Владимир Путин добива извештаи во реално време од Министерството за одбрана и службата за надворешно разузнавање на СВР.
Во детална изјава на барање на Путин, Министерството за надворешни работи остро го осуди Израел и го обвини колективниот Запад за создавање антииранска „хистерија“.
„Остро ја осудуваме употребата на сила од страна на Израел, која ја крши Повелбата на ОН и меѓународното право. Неиспровоцираните воени напади врз суверена земја-членка на ОН, нејзините жители, мирните градови и инфраструктурата за нуклеарна енергија се целосно неприфатливи“, се вели во соопштението.
Меѓународната заедница, се додава во соопштението, „не смее да си дозволи да биде рамнодушна кон ваквите злосторства што го уништуваат мирот и штети на регионалната и меѓународната безбедност“.
Русија во средата објави дека е подготвена да го отстрани високо збогатениот ураниум од Иран и да го претвори во гориво за цивилен реактор со цел САД и Иран да ги приближат ставовите, бидејќи една од опциите на Вашингтон е Техеран да го збогатува ураниумот до прифатливо ниво од 3,67 отсто чистота контролирано и во странство.
Москва верува дека не постои воено решение што би ги отстранило сомнежите и би ги смирило стравовите на Западот во врска со нуклеарната програма на Иран, додавајќи дека дипломатијата е единствениот одговор.
„Ги повикуваме страните да покажат воздржаност за да спречат понатамошна ескалација и тензии и тотална војна во регионот на Блискиот исток“, се вели во соопштението на Министерството.
Рускиот претседател Владимир Путин и иранскиот претседател Масуд Песков потпишаа документ за стратешко партнерство на 17 јануари. Руската Дума го усвои документот во април, додека иранскиот парламент ратификуваше 20-годишно стратешко партнерство меѓу Москва и Техеран за продлабочување на билатералните врски, вклучително и соработката во одбранбениот сектор, кон крајот на мај.
Иако договорот не вклучува клаузула за заемна одбрана, во него се наведува дека двете земји ќе соработуваат во врска со заедничките воени закани, ќе развиваат воено-техничка соработка и ќе учествуваат во заеднички вежби.