Јапонските научници развија пластика што се разградува во морска вода за неколку часа, што би можело да биде решение за загадувањето на океаните што го загрозува морскиот живот.
Експертите долго време експериментираат со биоразградлива пластика, а сега научниците од центарот RIKEN и Универзитетот во Токио развија нов материјал што се разградува многу побрзо и не остава траги.
Во лабораторија во градот Ваку во близина на Токио, пред две седмици тимот демонстрираше како парче пластика исчезнува во базен со солена вода откако стоеше околу еден час.
Учесниците не изнесоа детален план за комерцијализација, но лидерот на тимот, Такузо Аида, вели дека истражувањето привлекло значителен интерес, вклучително и од компаниите за пакување.
Научниците ширум светот се тркаат да развијат иновативни решенија за огромниот проблем со загадувањето со пластика, нагласен со кампањи како што е Светскиот ден на животната средина на 5 јуни.
Се очекува загадувањето со пластика да се зголеми тројно до 2040 година, предвидува Програмата за животна средина на ОН, што значи дека дополнителни 23 до 37 милиони метрички тони пластика ќе завршат во светските океани секоја година.
„Децата немаат право да ја изберат планетата на која живеат. Наша должност како научници е да им оставиме најдобра можна средина како наследство“, рече Аида.