Цените на акциите паднаа на европските берзи во петок претпладнето, бидејќи инвеститорите ги следеа вестите од Вашингтон, со оглед на тоа што се приближува 9 јули, рокот до кој Белата куќа сака да постигне што е можно повеќе трговски договори.
Индексот STOXX 600 на водечките европски акции падна за 0,4 отсто во првиот дневен пресек од тргувањето. Лондонскиот индекс FTSE падна за 0,27 отсто на 8.799 поени, додека франкфуртскиот DAX се лизна за 0,33 отсто на 23.855 поени, а парискиот CAC се намали за 0,64 отсто, на 7.705 поени.
Азиските берзи, исто така, се претпазливи. Индексот MSCI на акциите во Азиско-пацифичкиот регион падна за 0,2 отсто во истиот временски пресек како и во Европа. Во исто време, цените на акциите во Хонгконг и Јужна Кореја паднаа меѓу 0,7 и 2 отсто, додека во Австралија, Јапонија и Шангај пораснаа меѓу 0,1 и 0,3 отсто.
Инвеститорите не се наклонети кон поризични инвестиции како што се приближува рокот 9 јули, до кој Вашингтон сака да постигне договор со трговските партнери или да се соочи со зголемени царини.
Досега, Белата куќа објави дека постигнала договор за трговија само со Виетнам, како и рамковни договори со Кина и Велика Британија. Претседателот на САД, Доналд Трамп, исто така, изјави дека наскоро би можел да се постигне договор со Индија, но веројатно не до 9 јули.
Инвеститорите се несигурни бидејќи Трамп еден ден вели дека би можел да го помести тој рок, а следниот дека нема отстапувања од роковите. Покрај тоа, тој рече дека ќе почне да испраќа писма до партнерите со нови тарифи.
До неодамна се сметаше дека САД би можеле брзо да постигнат договор со Јапонија и Јужна Кореја, но се чини дека овие преговори не одат толку лесно како што се очекуваше.
„Сега само чекаме на 9 јули. Инвеститорите не се оптимисти, особено не во врска со преговорите со Јапонија и Јужна Кореја, поради што цените на акциите паднаа“, објаснува Тони Сикамор, аналитичар во IG.