Фудбалерите на Интер Мајами го обезбедија пласманот во доигрувањето на Главната лига откако го победија Њујорк Сити со 4:0 во натпреварот од 31-то коло на гостински терен.
Херој на натпреварот беше аргентинскиот мајстор Лионел Меси кој постигна два гола со една асистенција. Меси стигна до 24 гола на 23 настапи и моментално е најдобар стрелец во лигата, два гола пред Денис Буанга од Лос Анџелес.
Меѓу стрелците беше уште еден Аргентинец Балтазар Родригез, како и Уругваецот Луис Суарез, кој се врати по тридневна суспензија поради плукање на член на персоналот на Сиетл.
Интересно е што Меси имаше шанса да постигне хет-трик во 83. минута кога Интер заработи пенал, но реши да му даде шанса на својот долгогодишен соиграч Суарез.
„Тој го направил тоа премногу пати во својата кариера. Понекогаш гледа на некои соиграчи кои не постигнале гол, а ним им треба гол повеќе од него“, изјави тренерот на Интер, Хавиер Маскерано, за американските медиуми.
Мајами моментално е на третото место во Источната конференција, пет бода зад лидерот Филаделфија.
„Среќни сме и ни олеснува што ја постигнавме нашата прва цел, а тоа беше квалификација во плејофот. Сега ќе се обидеме да завршиме што е можно повисоко на табелата, што би ни дало предност на домашен терен“, додаде Маскерано.
Во другиот натпревар од вечерта, Ванкувер и Портланд одиграа 1:1. Гостите поведоа во 39. минута со голот на Камал Милер, а Брајан Вајт израмни во 88-мата минута.
Ванкувер е втор на Западот со 56 бода, еден бод зад лидерот Сан Диего. Портланд е седми со 43 бода.