Американскиот претседател Доналд Трамп прави многу за решавање на кризите што траат со децении, изјави рускиот претседател Владимир Путин пред новинарите по посетата на Таџикистан.
„Не е моја работа да судам дали сегашниот претседател на САД ја заслужува Нобеловата награда за мир или не, не знам… Но, тој навистина прави многу за решавање на овие сложени кризи што траат со години, во некои случаи дури и со децении“, рече рускиот лидер, одговарајќи на прашањето дали американскиот претседател ја заслужува Нобеловата награда за мир во 2025 година.
Норвешкиот Нобелов комитет одлучи да ја додели Нобеловата награда за мир за 2025 година на венецуелката Марија Корина Мачадо. Активистката ја доби наградата „за нејзината неуморна работа во промовирањето на демократските права за народот на Венецуела и за нејзината борба за постигнување праведна и мирна транзиција од диктатура во демократија“, објасни Комитетот во соопштението.