Од овој викенд продолжува реализацијата на проектот на Владата за бесплатен туристички викенд за пензионери. Заменик министерот за труд и социјална политика, Диме Спасов, денеска во Дојран посочи дека до мај, околу 2.500 пензионери ќе ја искористат оваа услуга, во туристичките центри во Охрид, Преспа, Дојран, Берово и Крушево.
Спасов и градоначалникот на Дојран, Борче Стамов, денеска беа во посета на пензионери во хотелот „Полин“ во Дојран.
– За реализација на овој проект ќе издвоиме околу 9 милиони денари, при што очекуваме до мај околу 2.500 пензионери да ја искористат оваа бесплатна услуга, а од септември уште околу 500 и со тоа да ја заокружиме планираната бројка од 3.000 пензионери, истакна Спасов.
Во првата група се 120 пензионери од целата земја, кои ќе одмараат во Охрид, а викенд-престојот вклучува два полни пансиони и автобуски превоз до хотелскиот објект.
Градоначалникот на општина Дојран Борче Стамов искажа задоволство што првата група пензионери за годинава својот бесплатен туристички викенд го почнува токму од неговата општина.
– Во Дорјан викендов има пензионери скоро од сите градови од Македонија. Првата група е од Источна Македонија, а во наредните викенди ќе доаѓаат од повеќе градови од земјата, рече Стамов.
Тој порача дека проектот е од посебно значење за местата како Дорјан, во месеците кога не е висока сезона и нема поголем број на посети и туристи.